കുമരകം : കൊച്ചിൻ സാഹിത്യ അക്കാദമിയുടെ 2024 ലെ മികച്ച സംഘാടക പ്രതിഭ പുരസ്‌കാരം കുമരകം സ്വദേശി അനീഷ് ഗംഗാദരനു ലഭിച്ചു. കുമ്പളങ്ങി പുഴയോരം റിസോർട്ടിൽ നടന്ന ചടങ്ങിൽ കൊച്ചി മേയർ അഡ്വ എം അനിൽകുമാർ സാഹിത്യ പുരസ്‌കാരം നൽകി അനീഷിനെ ആദരിച്ചു. അനീഷ് ഗംഗാദരന്റെ നേതൃത്വത്തിൽ കേരളത്തിലെ അങ്ങോളമിങ്ങോളമുള്ള തിരഞ്ഞെടുത്ത 50 ഓളം കലാ സാഹിത്യകാരന്മാരെ ഉൾപ്പടുത്തി കുമരകം എസ്.കെ.എം ഹയർ സെക്കന്ററി സ്കൂളിൽ സംഘടിപ്പിച്ച അക്ഷരക്കൂട്ടം എന്ന പരിപാടിയ്ക്കാണ് അവാർഡ് ലഭിച്ചത്. 25 ൽ അധികം സംഗീത ആൽബങ്ങൾക് രചന നിർവഹിച്ചും 15ൽ പരം മ്യൂസിക് ആൽബങ്ങൾ പുറത്തിറക്കിയും ശ്രദ്ധേയനാണ് അനീഷ്. ഇതിനു മുൻപ് ചെറുകഥ, കവിത എന്നിവയിൽ പുരസ്‌കാരങ്ങൾ നേടിയിട്ടുണ്ട്. കുമരകം പള്ളിച്ചിറ കുരിശുംവീട് ഗംഗാദരൻ – ഭാസുര എന്നിവരുടെ മകനാണ്. കവിയത്രിയും, മ്യൂസിക് ആൽബങ്ങളിലൂടെ ശ്രദ്ധ നേടുകയും ചെയ്ത ശരണ്യയാണ് ഭാര്യ. ഉത്ര, ഉത്തര എന്നിവരാണ് മക്കൾ
